Afgeloëpe vreejdag en zaoterdag was ’t wer tied vur os kermenaaj-visiet. Vorst René opende d’n aovend en hiete iederiën welkom en ien ‘t biezonder Prins Martijn en Nar Andy. Veurdat ’t programma echt begos wier dur Groëtvorst Herman de proclematie vurgedrage waornao de Prins en zien gevolg op hun plàts moge gaon zitte, um same te gaon kieke naor alle artieste.

Tradisie getrouw wier de spits afgebete dur de winnares van de playback-show van de schôl. Sanne Kessels playbackte “where have you been” van Rihanna en danste daor ok verekkes moj beej. De buutton kwaam op de buun vur Mike Willems den dit jaor as “Mike de bouwer” kwaam buurte ovver wat heej ’t afgeloëpe jaor wer allemaol vur grappige dinge haaj mitgemakt. Imke Versteegen liet wer zien dat zeej op hoëg nivo danst. 't Afgeloëpe jaor is ze Nederlands kampioen geworre mit ur solo-dans! Vur d’n urste kier deuj de APK mit beej de zitting. Paul Koppes vertelde dat zeej ’n idee hàn um de Prinse-Keuze-Kemmisie te hellepe um d’n neeje prins uut te kieze. Peter de Mulder haaj zich àngemeld um enne voetbal wedstrijd te organisiere en dat hàn ze gefilmd. Nao wat grappige momente op ’t voetbalveld gaaf Peter àn dat iederiën op hum mos stemme. Vur d’n 2e kier kwaam Sanne Kessels op ’t podium, nou nie um te playbacke mar um echt te zinge. Mit ’t mojje liedje "Vastelaovestent" haaj zeej mitgedaon àn ’t kiender vastelaoves liedjes festival ien Rooy. Nao ’t opbouwe van ’t decor kos de act van Gewoon Half beginne, die al wer vur ‘t 22e jaor op ’t podium stonte. Enne kabouter (Twan Versteegen) ging ien zienne kroewage zitte en vertelde ’t kerstverhaal dat wier uutgebeeld dur 5 smurfen (Jan Arts, Joep Versteegen, Frans Janssen, Martien Versteegen en Theo Koppes). Op weg naor ’t kribke makte zeej de gekste dinge mit. As làtste vur de pauze kwaam Bert ziene buut doen. Heej speulde Bert Visser, bruur van rijdende rechter Frank Visser. Heej was enne loëpende rechter en haaj wer ’nne groëte hoëp zake afgehandeld, en dan wette wat d’r kumt: "dat is mien uutspraak en daor zudde ’t mit motte doen". Hiernao was ’t alwer tied vur de pauze waorien iederiën wer kos geniete van de sneejkes krintemik mit kermenaaj. “Mèrsele viert Vastelaovend” zoë hiet de schlager van dit jaor, geschreve dur Bas Litjens den 'm same mit Andy Arts ten gehuure brôcht. Mit de tekst op tôffel kos iederiën dit mojje en pakkende nummer zoë mitzinge. Pim Paijens en Lambert Michels oftewel “de Neefjes” hàn wer ’n moj stuk bedocht, waorbeej ze vanalles uut hunne zwaore (of nie...) koffer hàlde, wat dan de gekste dinge opleverde. Vur de làtste kier kwaam de buutton op de buun, dit kier vur Rien den as slager (sleurklager) de gekste dinge ien zien slagereej mitmakte. Heej kreeg mit zien verhaal al gauw de zaal àn ’t lache, veural durdat heej de zaal goed beej zien verhaal betrok. Vur d’n allerlàtste kier kwaam de Titoti bv d’n dôrpspolitiek brenge. Nao 57 jaor, en dus vanaf ’t begin van de kermenaaj visiet wier dit stuk opgevoert, urst dur Albert Michels (van de meule) en Harrie Arts (Kampe Har). Làtter dus Herman Zegers en Noud Gielens en hiernao ok nog mit zien 3e mit Theo van Els d’r beej. Ok dit jaor hàn zeej wer vanalles gehuurd en gezien wat de Mèrselse meense wer vur ’n blunders en grappige dinge hàn mitgemakt. As làtste han zeej nog 'n leuk filmke waorien Herman (Tieske) en Theo (Teun) iederiën bedankte den zich op wat vur manier dan ok haaj geholpe um de stukke zoë te kunne make en brenge. Vorst René bedankte dees kèls vur alle mojje jaore en herrinneringe die iederiën d’r altied àn zal hebbe mit ’n moj cadeau.

Vorst René vroeg alle artieste nog iëne kier op ‘t podium, vur ’t artiestegala, waor Bas en Andy de schlager nog iëne kier zonge, en heej sloot d’n aovend af mit iederiën te bedanke, den hoe dan ok mitgeholpe haaj an ’t slage van dees moj aovende, mit as allerlàtst nog 'n "grôts bedankt" naor ’n geweldig publiek.