As ut neeje jaor wèr begonne is, dan wette dat ut wèr tied is vur enne neeje Prins. Ôk beej de Zagewetters is dat un goeij gebruuk. Op zaoterdag 9 jannewarie mosse we dan ôk afscheid neme van Prins Erwin I.

Toen Vorst René d'n aovend opende, vroeg heej Prins Erwin, Prinses Desiree en Nar Stefan vur de letste kier um op ut podium te komme. Prins Erwin kreeg nog iëne kier de kans um as Prins iederiën toe te sprèke. Heej miek dor dankbaar gebruuk van en bedankte iederiën den ien zien prinsejaor mitgeholpe haaj um d'r zônne schônne en onvergètelijke tied van te make. Naodat prins en nar van hun herkenbare attribuute ware ontdaon kreeg Déke Rob van de APK d’n microfoon. De urste opdracht die Erwin van de APK mit de resepsie haaj gekrege was ’n meziekinstrument make. Dit moog allieën van bouwafval gemakt zien en heej mos daor enne Mèrselse schlager op kunne speule. Heej haaj bieëstig goed gebouwd, en op zien van groeëte PVC-buuze gemakte instrument, en begeleid dur Desiree en Stefan, was 't al gauw duudelijk dat zeej “Mèrsele blieft Mèrsele” speulde en daormit was zien urste opdracht klaor en geslaagd, en kosse ze mit de APK mit naor Den Tommes.

Ien d'n tussentied begos DJ Ruud de zaal goed op te wèrme, en iederiën was zò langsamerhand wel ien spanning...wie zeuj toch de neeje prins van de Zagewetters werre...sommige wisse 't al...dochte ze… Vorst René kwaam op ’t podium en dan wette dat ’t gut gebeure, ’t begos mit kerstmeziek en van aachter ien de zaal kwaam enne kerstman (Bas Wilms) mit 'n groeëte slee binne. Ien die arreslee zaatte twieë gemaskerde kèls, ieëne ien ’n narrepak en ieëne mit ’n zwarte boks en 'nne witte blouse àn. Beej ’t podium àngekomme kreege zeej ’n paar vraoge, um d’r aachter te komme wie dat ze ware en of dat zeej ok diegene ware die Vorst René àn ’t zuuke was. Alle vraoge klopte mar toen de maskers af ginge bleek dat dit nie de prins en de nar van 2016 ware, mar Bjorn de Mulder en Johan Hoedemakers van de raod van 11.

Onder groeët applaus kwaame toen wel Prins Martijn (Wilms) en Nar Andy (Arts) uut ’t publiek ’t podium op gespronge. ’n Moij verrassing en zeker vur den kerstman Bas. Vorst René riep ok Prinses Mariska en Narrinneke Esther nor veur, en daor stond ’t gezelschap wat dizze vastelaovend veurop gut. Naodat alle beejbehurende versiersele dur Vorst René umgehange en opgezet ware, kreeg Prins Martijn de microfoon en moog heej vur ’t urst de zaal toespreke. Hiernao kwaam Groëtvorst Herman de Prinseproklemasie nog vurlèze, en die eindigde mit de leus van Prins Martijn:

DJ Ruud dreijde nog ’n paar uurkes goed dur en de urste polonaises van ’t jaor zitte d’r wer op.

Prins Martijn I, Prinses Mariska, Nar Andy en Narrinneke Esther hope dat gillie allemaol komt

beej alles wat d’r de kommende wèke wer te doen is ien ôs Zagewettersland.