Afgeloëpe zondag is, alwer vur de 28e kier, de Orde van Verdienste uutgereikt, en wel àn Jan Verhaag. Wat dizze meens allemaol vur Mèrsele en de Mèrselse gemènschap gedaon het en nog steeds duut is hôst nie op te schrieve.

Um 14:11 zien Prins Martijn, Nar Andy, raod en bestuur van de Zagewetters Jan thuus op gaon hale en hebbe ze Jan en Ans naor Den Tommes gebrocht.

Mit unne klatsmars en 'n ierehaag van raod van ellef en bestuur wiere Jan en Ans dur Prins Martijn en Nar Andy naor hun iere plàts op 't podium gebrocht. Vorst René opende de middag en vertelde waorum ’t bestuur van de Zagewetters vond dat Jan dees moij orde mugt ontvange en heej gaaf ’t woord an d’n urste sprèker: Huub Muijsers. Huub begos mit ’n moij anekdote ovver ziene tied as misdienaar same mit Jan zien bruur Piet. Names ’t kerkbestuur bedankte heej Jan vur alle beweze dienste, van begraafplats beheerder tot kerkmèster en van collectant tot wat heej nou nog duut beej de schoeffelploeg. Ok wier Jan gepreze vur zien werk wat heej verzet haaj beej ’t loskoppelen van ’t kerk- en ’t schôlbestuur. Ok kreeg heej en moije kàrs en ’n fles mis-wien.

Names d’n dörpsraod kreeg Theo Zegers ’t woord, heej bedankte Jan en Ans vur de verschillende vreejwilligers take die heej her en der haaj volbrocht. Heej prees de momente dat heej beej de diverse besture terecht was gekomme, mestal as ’t urgens wat minder liep kwame de veriëniginge beej Jan uut, um alles wer op de rails te zette. Jan Michels mede lid van “CCC de Kels” wat stut vur Club Cuisine Culinair oftewel de kookclub kos natuurlijk ok nie achter blieve um Jan te fillicitiere.

Heej vertelde ovver wat zeej zoal mitmake op zonne aovend en wat vur moeilijke weurd zeej al gelierd han mit ’t vurbereide van de 4-gange diners. Jan was wel blie dat den andere Jan zien aete nie zo dreug is as ziene humor. Ok kreeg Jan van de CCC enne holtere pollepel naodat heej urst ’n Michelin ster haaj probiere te kriege.

Jan het tot zien 69ste gevoetbald beej de veterane van SV Merselo, vandaag nie te herkenne an de geel/zwarte buttons, mar Henk Derks kwaam wer acte de presance gève vur Jan, den vanaf de oprichting af al 39 jaor lid is gewist. Umdat heej zelfs onder d’n douche zien piep nog àn haaj wier heej ok wel “de Piep” genuumd. Heej kreeg van Henk en moij sculptuur en natuurlijk ok 22 bonne, twieë vur Jan en Ans en twintig vur de rest van de veterane. Gerrit Hendriks moog names de Meziek Fiëste ok nog wat komme vertelle en ok heej haaj nog ’n moij verhaal ovver ziene tied as misdienaar. Gerrit prees Jan vur alle take die heej haaj vervult beej de MFM. Zoë halde heej mit de Ald Mèrselse Dag al ’t geld op beej de diverse krumkes en was heej de maker van de verdèlsleutel van de MFM zodat alle veriëniginge ieder jaor wer krege wat ze hàn verdiend. As làtste was zie aege femilie àn de beurt. Urst hàn zien 7 klènkiender allemaol klène gedichte gemakt ovver alle hobby’s die hunne opa het. Beej de kiender kwaam nog wat naor bôvve, dat zeej ien 1977 vur ’t làtst op ’t podium hàn gestaon ien Den Tommes, toen hàn zeej as femilie den twedde plats behald mit de speurtocht van de Natuurvriende. Zeej hàn nog veul moije anekdotes ovver Jan as veriënigingsman mar ok as femilieman!

Vurdat de resepsie kos beginne laas Vorst René de officiële Oerkonde veur en gaaf heej ’t woord àn de orde drager van 't vurrig jaor, Jan Arts, vur ’t ovverhandige van ’t verke dat huurt beej dees orde. Jan vertelde verierd te zien um Jan dees orde te meuge ovverhandige gezien zeej jaorelang, mit Jan as sjef, samegewerkt hebbe beej AMS, Altied Mar Sjouwe. Ok dankte heej Jan names SV Merselo vur de jaore dat heej diverse take binne ’t bestuur haaj gedaon en ok nog veurzitter was gewist.

Een lange resepsie volgde waorbeej iederieën en moij speldje van Jan kreeg.

't Làtste woord was natuurlijk vur Jan zellef, en as urste bedankte heej zien Ans dat heej al dat vreejwilligerswerk haaj kunne doen, mit alle steun van ur. Ok bedankte heej alle sprèkers en alle meense die ware gekomme, ’t bestuur van de Zagewetters en netuurlijk zien gezin.

De Rosentaler stondte nao ’t officiële gedeelte metiën klaor um d’r nog 'n knallend bal van te make. Wel wiere zeej onderbroke dur ’t bestuur van de Vorsteroad, zeej kwame ’n onderscheijing uutrijke, en wel àn Ton Janssen. Vur zien ellef jaor lidmaatschap beej ’t bestuur van de Zagewetters.

Same mit Jeugdprinses Anita en Jeugdnarrinneke Sanne bleef ’t nog lang gezellig en gaon we mit ’n goei gevuul dur naor de kommende wèke waor wer vanalles te doen is.

En weej hope dat gullie d’r dan ok wer allemaol beej ziet.