Verslag Baggebal 2020

© De Zagewetters 2015 - 2021                                                                               Contact met Webmaster

Baggebal Zagewetters 2020



Afgeloëpe zondag vond ’t urste Baggebal van de Zagewetters plàts ien Residentie den Tommes. ’t Jeugdbal mit en thema, en bald dat werd afgewisseld mit optredes. ’t Thema gekoze dur òs Jeugdtrio: “Glitter & Glamour” wier dur veule uutgeverd ien mojje glitterende en glamoureuze pèkskes en attribute.

Prinses Marte I, Vorsting Lieke en Narrinneke Romee ware blie mit de groëte opkomst van veule Zagewetters en Vastelaovesvierders en ware onder d’n iendruk van de schònne pèkskes.

Natuurlijk wier nog efkes de neeje outfit van de dansmariekes van de Zagewetters geshowd welke vanaf nou te zién zien mit de Vastelaovesbals.

DJ Amber moog vol gas gaeve mit eur muziek van Prinses Marte. Prinses Marte liep veurop gevolgd dur eur Vorstin en Narrinneke, de Raod  en de Dansmariekes. Alle jeugd, mar òk de aldere gave d’n polonaise of anderen dans kleur beweging en enne groëte lach.

Vorstin Lieke kondigde tussendur verschillende artiesten àn, die begeleid dur 2 Dansmariekes onder enne klatsmars vanuut de zaal naor ’t podium kwame. Weej moge geniete van de Zagewetters Dansgarde Mini’s (Jennifer Litjens, Jill Stoter, Eline Deiling, Bo Hendrickx, Saar Custers, Rachel Litjens, Noor Custers en Elke van den Boogaard) die enne geweldigen dans liete zien waor iederiën jaloers op was. Buut ‘Tontje van Boekel” scheidsrechter (Roy Willems) waor gèle en rooje kaarte veurbeej kwame en òk en slagroomspuit. De moppetrommel van Fien van Loon mit moeilijke raodsels en schòn moppe. De Zagewetters Dansgarde Maxi’s (Evi Tijssen, Imke Wilms, Floor van Kempen, Sydney Verstappen en Sjors Rameckers) mit enne spetterende dans die daornao dur de Jeugddansmarietjes nog enne kier moog werre uutgevoerd. En dit bleek moeilijker dan gedocht. Buut “Boer Frenske”(Mike Willems) den verkes en ganze ien de zaal zaag maar niks liever dan boer wil zien. En as afsluuter ’t lied “Pirate van de Maas” gezonge dur Luca Heesbeen en Roy Willems wat volges Vorstin Lieke toch wel de neeje Zagewettersschlager mos werre.

Naodat de mojst verkleejde nog enne snoepzak kreeg, wier iederiën nog enne kier bedankt dur ’t Jeugdtrio vur ’t goej bezochte Baggebal en hope zeej alle jeugdige Zagewetters nog te zien op eur resepsie, beej d’n optocht of dinsdag op ’t Koppienbal. Of beej alle andere vastelaovesbals.

De muziek ging nog enkele uurkes dur, want volges Prinses Marte, Vorstin Lieke en Narrinneke Romee werd dit de Vastelaovend van eur laeve!